Serfirazî

SERFIRAZÎ

Xamevan (Mustefa Reşîd), Berlîn, 1993(guhertin 2002)

Pir ji evîna te biryan im
Dil bi agir, cîger bi kovan im
Evîndarê te me, welat im, can im
Kurdistanim, Kurdistanim, Kurdistanim
Ev çend sal in, perîşan im, sergerdan im
Ev çend sal in di bin destê Ecem de
Di bin sûrê Ereb de
Li bin pença Tirkan im
Na! .... Na! ....
Ne termekî bê giyan im
Tenê tu zendên min derxe ji vê zincîra koletiyê
Tê bibînî
Çi cengewar im, çi şervan im
Çi sergevaz im, çi qehreman im

Ez qurmê dîroka cîhan im
Hên dayîka Somer,
Zarokên xwe bi min dixistin xew
Ma tu nizanî!?
Ez kurê Goto me, kurê Lolo me
Kurê Horo me, kurê Mîtan im
Ez torinê Mad im, bi xeml û xêzên giran im
Ez avakirê birc û serayên Ekbetan im
Kawayê hesinkar im
Dijminê zordar im
Agirê newroz im
Rêberê azadiya gelan im
Hên jî zindî me, xwedî jiyan im
Kurd im, nemird im, torinê wan im

Zerdeşt im
Ronahîperest im
Li hember tariyê
Roja li esman im
Manî me, danayê şîret û pendan im
Erdeşêr im, Rustem im, Noşîrwan im
Bi rim im, bi şûr im, bi mertal im
Bi xençer im, bi şilf im, bi pal im
Bi zirx im, bi gurz im, bi qelqan im
Rûberê lekên leşkerê Rom im
Li meydan û tiradê
Çi pehlewan im, çi qehreman im
Hên jî zindî me, xwedî jiyan im
Kurd im, nemird im, torinê wan im

Ez im ew Kurdê bi nav û deng
Ez im Kardoxê bi tîr û xedeng
Di ser min re borîn
Pir çax û pir dem, pir heyam û beng
Li ser sîngê min
Her car û her sal, her roj û her gav
Êriş û talan, her şer û her ceng
Min dîtin pir roj
Min dîtin pir şev
Ew demên zêrîn, ew rojên pir teng
Êrişên Ereb, talanên Megol
Ji Rom, ji Fireng
Ez mam li meydan, nebûm pereng-pereng
Hên jî zindî me, xwedî jiyan im
Kurd im, nemird im, torinê wan im

Ez siwarê Rojhilat im
Parêzkarê birc û kelat im
Şêrkohê cengewar im
Spahsalar im, îsfahsalar im
Li hember Fîlîp û Rîşar im
Selahedîn im, li ser xana zîn im
Qehremanê Hetîn im
Rizgarkirê Quds û Felestîn im
Her serfiraz im, çi sultan im
Adil im, Zahir im, Tûran im
Ez bi taca zêrîn im
Li Amed û Farqîn im
Li ser textê Merwan im
Ehmedê Dehak im, siwarê bi tîn im
Generalê Romê ji xana zîn diqulbînim
Çerxa dîrokê vedigerînim
Herdem zindî me, xwedî jiyan im
Kurd im, nemird im, torinê wan im

Ez im, ji van çiyan re nav û nîşan im
Ez pilingê Xerzan im, şêrê Botan im
Bazê Behdînan im, ejderê Soran im
Ez şahînê Erdelan û Baban im
Canpolatî me, mîrê Mand im
Ez im, li kela Dumdumê Mîrxan im
Mîrxanê Lepzêrîn, egîdê qehreman im
Dewrêşê Evdî me, bi diwanzdeh siwaran
Li Hember hezar û heftsed siwarên Gêsan û Tirkan im
Hên jî zindî me, tijî jiyan im
Kurd im, nemird im, torinê wan im

Ez Herîrî me, Cizîrî me
Feqî me, Nalî me, Xanî me
Hejar im, Hêmen im, Goran im
Cegerxwîn im, Osman im, Qedrîcan im
Biwêj im, şekerrêj im
Ez xweş dibêjim, her torevan im
Fehlemez im, awazciwan im
Li rûpelên dîrokê binêre!
Herdem nazikziman im
Ez xwedî nirxên bilind im
Demîn û sinciyên giran im
Ez ji welatê evîn im
Ferhad im, Şêrîn im
Xec im, Siyamend im, Zîn im
Memê Alan im
Hên jî zindî me, tijî jiyan im
Kurd im, nemird im, torinê wan im

Ez xêr û bêra germiyan im
Ez av û berfa ji zozan im
Petrol im
Dibim agir, dikim gurgur
Kermanşah im, Kerkûk im,
Batman im, Rimêlan im
Ez qêrîna keçan û bûkan li Geliyê Zîlan im
Hawara minalan li Kela Dizan im
Ez loriya dayîkê, axîna bavê kal,
Nalîna zarokan li Helebceya xopan im
Dîsan zindî me, xwedî jiyan im
Kurd im, nemird im, torinê wan im

Ez keça Kurd im, nazikrewan im
Ji bon herdu çavên min
Ew baxên bala li Babil hatine avakirin
Gul im, sûsin im, rihan im
Nêrgiz im, nesrîn im, pûjan im
Ez vîn û evîna têkoşerên Kurdistan im
Leyla me, Leyla
Xedenga li çavên dijmin im
Ez di qada ser de Bêrîvan im
Li şarê evînê, li Cizîra Botan im
Ez li kolanên Dêrsimê Zîlan im
Mizgîna leheng im, li kenarên Tatwan im
Hên jî zindî me, tijî jiyan im
Kurd im, nemird im, torina wan im

Ez duhî li Diyarbekrê Şêx Seîd bûm
Li Dêrsimê Seyid Riza bûm
Li Mehabadê Qazî bûm
Iro jî li zîndanên Amedê,
Xeyrî me, Kemal im,
Akif im, Çîçek im,
Dogan im, Dogan im, Dogan im
Ez di şer de çi Egîd im, çi komîtan im
Serbazê nenas im,
Li her bihosteke axa niştiman im
Binêre ey dîroka cîhan!
Herdem zindî me, tijî jiyan im
Kurd im, nemird im, torinê wan im

Social

Çîrok

Qaliwek im le herdê rûyê min le asimîn
Şev û ro di’a dekim, melek dewêjin amîn
Di’ayî min mustecab ke, Xwudawendê alemîn
Ya Milwarîyê we min gihîn, ya canê min tu bistîn

Pêkenî

Ubêyd Zakanî ji navdartirîn nivîskarên mîzahî û tanz li Îranê ye ku li
bajarê Qezvînê jîyaye. Ew rexnegirekî gelek wêrek û vekirî bûye û ji
gotina rastîyan tu carî netirsyaye.

Helbest

Qaliwek im le herdê rûyê min le asimîn
Şev û ro di’a dekim, melek dewêjin amîn
Di’ayî min mustecab ke, Xwudawendê alemîn
Ya Milwarîyê we min gihîn, ya canê min tu bistîn